من وحى قصة حقيقية لأسرة بالمنوفية رحمهم الله
---------------- العيد اللى عيدناه -------------------
قالولنا العيد وهنعيد
لبسنا جديد وبنجدد
وقولنا أدامنا اهو قعدين
بلبس العيد ومش خرجين
يدوب هنزور قرايبنا
أهى ساعة أوام رجعين
ماهو دا حالنا باستمرار
لا بتوع فسحة ولا خروجة
هو العيد يدوب ساعتين
دا شغل كتير ومش فاضيين
لأ ياولاد قوموا يلا
هاخرجكم وافسحكم
وقوم يا أسامة قول لامك
أبويا لابس وخليها تلبسكم
وقول ياحبيبى لاخواتك
أبوكو ناوي يطلعكم
اهو رحلة وانا معاكم
وأمى كمان بوجودها تفرحكم
قناطر إيه يا عم عماد
ماهنا خضرة وخضرة هناك
كمان إن كان على المية
فبحرنا ده أهو هادى بيستناك
دا ناس بتجيله من بيتها
نسيبه احنا مانيش فهماك
ياستى استنى أهى رحلة
دى مش ليا ولا ليكى
دا حتى أسامة واخواته
فرحهم بان فى عنيكى
سبيلى أسامة اهو ف ايدى
وخدى البنتين ف ايديكى
قول خدت بناتى ف ايديا
وهو كمان
شايل ابنه على كتافه
وأدينا خرجنا لقدرنا
مع تعبنا
أهى البسمة على شفافه
وصلنا يادوب
وحط أسامه من أيده
وقال يا بنات
نجهز لقمة نفطرها
وبعد ماكلنا
أهى الولاعة
وسجارة يعفرها
وعيالنا قاموا
اللعب مايفوت حد
وروحت سرحت
فى المنظر دا حلو بجد
يخليك ليا ياراجلى ولعيالك
وانت يابنى يخليك ليا دعيالك
قول وانا سارحة
بخيالى وبصة بعيد
وعينى جت على
عيالى بلبس العيد
وفجأة سمعت صوت عالى
يقول الحق
أسامة وقع فى الميه
واهو بيغرق
جريت وابوه مسابقنى
يقول يابنى
غيتونى ياناس
ونط وراه وجنبنى
بيفدى إبننا بروحه
وراح وياه
بقى جوزى يارب
وإبنى اللى بتمناه
يارب دى حكمتك
ولا فى اعتراض منى
تاخد منى لاتنين
العين مع النينى
لايكون دا حلم ياولاد
ولا كابوس نسياه
لا والله باين حقيقة
والعيد اللى عيدناه
....................... #بنات_افكارى_احمد_سعيد
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.