...
قلبي مش عاوز سكات
أو حنين أو ذكريات
قلبي عاوز كل لحظه
يلقي في عيونك حاجات
..
قلبي في الحب اللي بادي
انتي ليه شايفاني عادي
انتي ليه ساكته وبعيده
ليه الاقي الحب هادي
..
(اه )باقولها وبصراحه
قلبي مش عايش في راحه
كوني ليا كل يومي
مش تحيه في اصطباحه
..
نفسي احس بحب مالي
كل وقتي وكل حالي
نفسي اعيش عالم حقيقي
وابقي حر من خيالي
..
قلبي قرب م الجنون
في الجمال محتاج فنون
يبقي طاير م الشفايف
وابتسامه في العيون
..
شعلليني وحركيني
وبجنونك جننيني
وارمي احزاني الجريحه
بره أيامي وسنيني
..
كل شيء بيكون تمام
لما تديني اهتمام
قلبي أعلن حرب فيكي
قلبي مش محتاج سلام
..
حبي جد ومش هزار
أقوى من شمس النهار
حبي مش في هدوء مشاعر
حبي ثوره و جمر نار
..
كلمات /خالد محمد
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.