★طلع بوها زجال★يزيد علوي اسماعيلي

★طلع بوها زجال★

سيادي واش هاذ الجمال
عين خضرا و الحاجب هْلال
الشعر ذهبي مسبَّل ظلال
لابسة الكعب العالي

قد و قوام نخوة و دْلال
الزين زينة و الطيب غزال
صدر عالي ك قمام جبال
سيادي زاد هبالي

را الزين ما تخطاه فضال
المشية معبورة بْتْوال
رزينة ... همة ... و كمال
سيادي و راني الّلالي

هاذ العشق ما كان على بال
باش ننساه أنا ... محال
اصبحْتْ اليوم عليه عُوّال
بغيتها تكون ديالي

دار ف بالي ألف سؤال
لساني تقال قلُّو لقوال
بغيت نطلب منها لوصال
خفت و الحشمة ف خصالي

قلت نكتب و ندير الفال
كلامي تلف و لقلم تقال
و الحرف ف الجوف دبال
و منين نبدا موالي ؟؟؟

لو الحب يتباع بالمال
بعملة درهم او ريال
كن شريت منو شلال
نهديه للزين الغالي

قلت نفتح هاذ الجوال
نكتب لها شي مرسال
كلمتين من بْها(ء) لقوال
عساها ترق الحالي

وصلها ، جاوبت ف الحال
قالت لي يا عز الرجال
يلا صادق ما فيك حيال
آجي راه عندي والي

طلبت بوها و اسمو علال
قلت لو جيت طالب لحلال
و على جودك راني عوال
عافاك فك خبالي

راسمالي حسن الافعال
مانا قاسي ما معلال
قال لي مرحبا يا زجال
نحب الناس امتالي

*طلع بوها زجال بحالي*

يزيد علوي اسماعيلي